रोशन काफ्ले , ४४३१९ पटक हेरिएको
इलाम-इलामको माईजोगमाइ गाउँपालिकामा राष्ट्रपती रनिङ शिल्ड प्रतियोगिताको छनौट खेल सम्पन्न भएको छ ।
माईजोगमाई गाउँपालिकाको केन्द्र नयाँबजार स्थित अमर कल्याण माध्यमिक विद्यालयको खेल मैदानमा फागुन २ देखि ४ गते सम्म राष्ट्रपति रनिङ शिल्डको छनौट खेलहरु संचालन भएको हो ।उक्त छनौट खेलमा ट्राक , फिल्ड भलिबल लगायत जम्मा २८ खेलहरु समावेश भएको थियो । छनौट खेलमा माईजोगमाई भरिका ८ वटा सामुदायिक विद्यालयहरुले सहभागिता जनाएका थिए ।
माईजोगमाई गाउँपालिका भित्रका सामुदायिक विद्यालय स्तरीय राष्ट्रपति रनिङ सिल्ड प्रतियोगिता पहिलो पटक गरिएको अमर कल्याण माध्यमिक विद्यालयका शिक्षक घनश्याम पौडेलले जानकारी दिए ।
राष्ट्रपति रनिङ शिल्ड छनौट खेलमा १३ स्वर्ण ६ रजत र ५ कास्य पदक सहित २४ पदक जितेर अमर कल्याण मावी नयाँबजार पहिलो भयो ।
६ स्वर्ण २ रजत र १ कास्य पदक सहिज जम्मा ९ पदक जितेर शिरिसे मावी माइजोगमाई ५ दोस्रो बन्यो यस्तै ४ स्वर्ण ७ रजत र ५ कास्य पदक सहित जम्मा १६ पदक जितेर नामसालिङ्ग मावी माइजोगमाई ३ शुक्रबारे तृतीय बन्यो ।
समापन कार्यक्रमको अध्यक्षता अमर कल्याण माविका विद्यालय व्यवस्थापन समिती अध्यक्ष यामकुमार कार्की , प्रमुख अतिथि माईजोगमाई गाउपालिका अध्यक्ष कुश बहादुर थेवेले गरेका थिए ।आगामी बर्षको राष्ट्रपति रनिङ सिल्ड प्रतियोगिता नामसालिङ माविले गर्ने र राष्ट्रपति रनिङ सिल्ड छनौट खेलको झण्डा आगामी बर्षको आयोजक नामसालिङ माविलाई यो बर्षको आयोजक अमर कल्याण माविले हस्तान्तरण गरेको शिक्षक घनश्याम पौडेलले बताए ।
प्रकाशित मिति: २०२३-०२-१७ , समय : ०८:५५:०६ , २ वर्ष अगाडि