झापा एक्सप्रेस , ३७२५१ पटक हेरिएको
झापा, बैशाख १९ – झापा जिल्लाको झापा गाउँपालिका–७ झागाटोलमा आज दिउँसो एक भान्सा घरमा आगलागी हुँदा करिब ५० हजार रुपैयाँ बराबरको क्षति भएको छ।
स्थानिय गोविन्द सिंह क्षेत्रीको टाटी बेरा र फुसको छानो भएको भान्सा घरमा दिउँसो करिब १:३० बजे चुलोबाट अचानक आगो सल्किएको हो। आगो भान्सा घरसँगै जोडिएको गोठमा समेत फैलिएको थियो।
घटनाको जानकारी दिइएको २:०० बजेपछि प्रहरी चौकी शरणामतिबाट खटिएको प्रहरी टोलीले स्थानीयवासीको सहयोगमा आगो नियन्त्रणमा लिएको थियो। करिब २:४५ बजे पूर्णरूपमा आगो नियन्त्रणमा आएको प्रहरीले जनाएको छ।
आगलागीबाट भान्सा घर र गोठमा रहेको भाडावर्तन पूर्णरूपमा जलेर नष्ट भएको छ भने अन्य कुनै मानवीय वा चौपाया क्षति नभएको जनाइएको छ।
प्रहरीका अनुसार घटनाबारे थप अनुसन्धान जारी छ।
प्रकाशित मिति: २०२५-०५-०२ , समय : २०:०२:११ , १ हप्ता अगाडि